कञ्चनपुर: सुदूरपश्चिम प्रदेशसभा सदस्य वीरबहादुर थापाले पदबाट राजीनामा दिएपछि कञ्चनपुर निर्वाचन क्षेत्र नम्बर १ को प्रदेशसभा सदस्य पद रिक्त भएको छ।
प्रदेशसभा सचिवालय, सुदूरपश्चिम प्रदेश, धनगढीले २०८३ असोज ३० गते जारी गरेको सूचनाअनुसार नेपाल कम्युनिस्ट पार्टी (एमाले) बाट प्रत्यक्षतर्फ निर्वाचित प्रदेशसभा सदस्य थापाले नेपालको संविधानको धारा १८० (क) तथा सुदूरपश्चिम प्रदेशसभा नियमावली, २०८० को नियम १९४ (१) बमोजिम स्वेच्छिक रूपमा राजीनामा दिएका हुन्।
सूचनामा उल्लेख भएअनुसार थापाले आफ्नो राजीनामासम्बन्धी पत्र प्रदेशसभाका सभामुखसमक्ष पेस गरेका थिए। उनको राजीनामा मिति २०८३ असोज ३० गतेदेखि लागू हुने गरी प्रदेशसभा सदस्य पद रिक्त भएको जनाइएको छ।
प्रदेशसभा सचिवालयका निमित्त प्रदेशसभा सचिव लक्ष्मीप्रसाद जोशीद्वारा हस्ताक्षरित सूचनामा सुदूरपश्चिम प्रदेशसभा नियमावली, २०८० को नियम १९५ को उपनियम (२) बमोजिम सम्बन्धित सबैको जानकारीका लागि उक्त सूचना प्रकाशित गरिएको उल्लेख छ।
थापा कञ्चनपुर निर्वाचन क्षेत्र नम्बर १ बाट प्रत्यक्ष निर्वाचित प्रदेशसभा सदस्य थिए। उनको राजीनामासँगै उक्त निर्वाचन क्षेत्रको प्रदेशसभा सदस्य पद रिक्त भएको छ।
टिप्पणी