बैतडी, ५ असार – बैतडीको दशरथचन्द नगरपालिका-४ साईलेकस्थित दशरथचन्द राजमार्गमा शुक्रबार बेलुका एउटा बस दुर्घटना हुँदा एक जनाको मृत्यु भएको छ भने १० जना घाइते भएका छन्।
जिल्ला प्रहरी कार्यालय बैतडीका अनुसार धनगढीबाट बैतडीतर्फ आउँदै गरेको सुदूरपश्चिम यातायातको सु.प.प्र.०१-००१ ख ३६४६ नम्बरको बस बेलुका अन्दाजी ५:४० बजेको समयमा अचानक अनियन्त्रित भई सडकबाट करिब २५/३० मिटर तल खसेको हो।
मानवीय क्षति र घाइतेको अवस्था
दुर्घटनामा परी बैतडीको दशरथचन्द नगरपालिका-६ बस्ने ३५ वर्षीय विरेन्द्र बहादुर चन्दको मृत्यु भएको छ। बसमा चालकसहित जम्मा १२ जना सवार थिए। घाइते १० जनाको हाल जिल्ला अस्पताल बैतडीमा उपचार भइरहेको छ।
घटनाको जानकारी पाउनासाथ जिल्ला प्रहरी कार्यालय बैतडीबाट प्रहरी नायब उपरीक्षक (डीएसपी) दीपक कुमार रायको कमाण्डमा २५ जनाको प्रहरी टोली घटनास्थलमा खटिएको थियो। दुर्घटनास्थल जिल्ला प्रहरी कार्यालयबाट करिब ३ किलोमिटर पूर्व पर्दछ।
दुर्घटनाका बस चालक बैतडीकै पाटन नगरपालिका-८ बस्ने ३७ वर्षीय केशव सिंह महरालाई प्रहरीले नियन्त्रणमा लिएको छ। उनी सकुशल रहेका छन्। घटनाबारे थप अनुसन्धान भइरहेको प्रहरीले जनाएको छ।
प्रतिक्रिया