कञ्चनपुर,२ साउन- ​कञ्चनपुरको दोधारा चाँदनी नगरपालिकास्थित महाकाली नदीको बीच टापुमा फसेका एक पुरुषको शनिबार बिहान सकुशल उद्धार गरिएको छ।

​जिल्ला प्रहरी कार्यालय कञ्चनपुरका अनुसार आज (साउन २ गते) बिहान करिब साढे सात बजे दोधारा चाँदनी न.पा. वडा नं. ०४ मालिकास्थित महाकाली नदीको बीच टापुमा एक अपरिचित पुरुष व्यक्ति फसेको जानकारी प्राप्त भएको थियो।

​काभ्रेपलाञ्चोक जिल्लाको चौरी देउराली गाउँपालिका वडा नं. ६ लहरेटोल बस्ने ५२ वर्षीय उमेश चौलागाईलाई सुरक्षाकर्मी र स्थानीयको संयुक्त प्रयासमा सकुशल उद्धार गरिएको हो।

घटनाबारे जानकारी हुनासाथ इलाका प्रहरी कार्यालय दोधारा चाँदनीबाट प्रहरी सहायक निरीक्षक (प्र.नि.) को कमाण्डमा उद्धार सामग्रीसहित १० जनाको टोली र सशस्त्र प्रहरी गुल्म देवीस्थानबाट सशस्त्र प्रहरी सहायक निरीक्षक (स.प्र.नि.) को कमाण्डमा १० जनाको टोली खटिएको थियो।

​बिहान ०७:४५ बजे घटनास्थल पुगेको नेपाल प्रहरी, सशस्त्र प्रहरी र स्थानीय बासिन्दाहरूको सहयोगमा  चौलागाईलाई सुरक्षित रूपमा नदीबाट बाहिर निकालिएको जिल्ला प्रहरी कार्यालय, कञ्चनपुरका सूचना अधिकारी एवं प्रहरी नायव उपरीक्षक टेक बहादुर रावतले जानकारी गराएका छन।